రూ. 2 లక్షల పైబడిన నగదు లావాదేవీలకు చెక్ : నల్లధనాన్ని అరికట్టడం కోసం నగదు రహిత లావాదేవీలను ప్రోత్సహిస్తోన్న ప్రభుత్వం ఈ దిశగా కఠిన నిర్ణయాలు తీసుకుంటోంది. అందులో భాగంగా.. నగదు లావాదేవీలను రూ. 2 లక్షలకు పరిమితం చేయాలని నిర్ణయం తీసుకుంది. ఇందుకోసం ఫైనాన్స్ బిల్లు 2017కు సవరణలు చేయాలని ప్రభుత్వం భావిస్తోంది. రూ. 2 లక్షలకు మించి నగదు లావాదేవీలు నిర్వహిస్తే.. భారీగా జరిమానా విధించే దిశగా కేంద్రం ఈ బిల్లుకు మార్పులు చేస్తోంది. ప్రస్తుతం ఈ బిల్లు విషయమై లోక్‌సభలో చర్చ జరుగుతోంది. ఒకవేళ ఈ నిబంధనను ఉల్లంఘిస్తే.. లావాదేవీకి సమానంగా జరిమానా విధించనున్నట్లు రెవెన్యూ శాఖ కార్యదర్శి హస్ముఖ్ అదియా ట్వీట్ చేశారు. వాస్తవానికి నగదు లావాదేవీలను రూ. 3 లక్షలకు పరిమితం చేస్తున్నట్లు బడ్జెట్ సందర్భంగా ఆర్థిక మంత్రి అరుణ్ జైట్లీ ప్రకటించారు. మార్చి 1 నుంచి ఈ నిబంధన అమల్లోకి రాగా.. ఇప్పుడు దాన్ని రూ. 2 లక్షలకు పరిమితం చేసేలా ప్రభుత్వం చర్యలు ఉండటం గమనార్హం. నగదు రహిత సమాజమే లక్ష్యంగా ముందడుగేస్తున్న కేంద్రం.. బడ్జెట్ సందర్భంగా ఆదాయపన్ను చట్టంలో సెక్షన్ 269ఎస్‌టీని చేర్చింది. దీని ప్రకారం ఏ వ్యక్తి కూడా ఒక్క రోజులో రూ. 3 లక్షలు లేదా అంత కంటే ఎక్కువ మొత్తాన్ని నగదు రూపంలో తీసుకోవడం కుదరదు. ఒకే లావాదేవీ ద్వారా కూడా ఇంత మొత్తాన్ని తీసుకోలేరు. అయితే ఈ నిబంధనలు ప్రభుత్వాలకు, బ్యాంకింగ్ రంగ సంస్థలు, పోస్టాఫీస్ సేవింగ్స్ బ్యాంక్‌లు, కోఆపరేటివ్ బ్యాంకులకు వర్తించవు. పరిమితికి మించి లావాదేవీలు నిర్వహిస్తే.. అందుకు సమాన మొత్తంలో పెనాల్టీని చెల్లించాల్సి ఉంటుందని ప్రభుత్వం స్పష్టం చేసింది. ప్రభుత్వ తాజా చర్యలతో ఈ పరిమితి రూ. 2 లక్షలకు తగ్గనుంది.