ఆగ్నేయ బంగాళాఖాతం మరియు నైరుతి బంగాళాఖాతం ఆనుకుని ఉన్న తీవ్రమైన వాయుగుండం డిసెంబర్ 7వ తేదీ సాయంత్రానికి తుఫానుగా మారనుంది. ఇది ప్రస్తుతం చెన్నైకు 700 కి.మీ దూరంలో ఉంది. ఇది డిసెంబర్ 8వ తేదీ ఉదయానికి తమిళనాడు, దక్షిణ ఆంధ్రప్రదేశ్ తీరానికి చేరనుంది. ఇది తదుపరి 48 గంటలు పశ్చిమ-వాయువ్య దిశగా కదులుతూ ఉత్తర తమిళనాడు-పుదుచ్చేరి మరియు ఆనుకుని ఉన్న దక్షిణ ఆంధ్రప్రదేశ్ తీరాల వైపు కదులుతుంది. దీని ప్రభావంగా ఆంధ్రప్రదేశ్ లోని అన్ని సముద్రతీర ప్రాంతాలలో డిసెంబర్ 7వ తేదీ నుంచి 10వ తేదీ వరకు సముద్రంలో గాలి వేగం 45 నుంచి 55 కి.మీ వరకు ఉండవచ్చు. అలాగే సముద్రంలో అలల ఎత్తు 7 నుంచి 10 అడుగుల వరకు ఎగిసిపడతాయి. కావున మత్స్యకారులు అప్రమత్తంగా ఉండి డిసెంబర్ 10వ తేదీ రాత్రి వరకు చేపలవేటకు వెళ్ళరాదని సూచిస్తున్నాము.